Am Samschtig Morgä häi mr is, das Moll sogar pünktlich, z Sissech am Bahnhof troffä. Mim Büssli vom Flu häi mr is z sächst uf ä Wäg richtig Ülägrot gmacht.
Nach mä churzä Zuästig vom Parkplatz us simmer denn au scho gli, nid ganz äläi, bim Iistig acho. Der Himmel hed zwar no chli s Niesse gha und so hämer grad nachem Paratmache no churz gwartet, dass mir nid z vill abbechömme. Die erschti Seillängi isch für die Erschte no chli nass gsi. Bis denn aber alli am Fels kläbt sind, hed sich der blaui Himmel afo bemerkbar mache. Schnäll isch de räge vergässe gsi und ei schöni längi nach de andere gnosse worde. Zwischedure het me scho eher wider de schatte (oder Sunnecreme) gsuecht. Aber d ussichte bis in d Alpe und es glace nach em abstieg lön d härze höher schloh.
Mit em Glace im Buch und em Bier im Gepäck simmer denn witer and Aare. Plantsche und gniesse duet nach sonere heisse Kletterei super guet! Für die nervöse Bruggespringer het sich sogar no was kleins gfunde, wo sich die eint oder anderä Luftrotatione händ lo üebe. 🥳 Natürlich wär dr normali Wäg uf die schwindelerregend hochi Brugg zu langwiilig gsi und drum hän sich gwüssi no e churze Boulderufschwung übr s Gländer gönnt (vilicht sogar e Erstbestiigig). Nachdem s Synchronspringe optimiert und au d Arschbombetauglichkeit vo emne übr s Wasser ragende Baum teschted worde isch, hän mr d Aare ufgrund vo ihrer Temperatur als definitiv bebadbar abgstämplet. Drnoch hän mr uns vo de warme Sunnestrahle trochne loh. Es isch wieder mol e super JO-Tour gsyy mitere tolle Gruppe.
Mir sind natürlich au wieder mol kreativ gsy bim Tourebricht schribe und jede het 3 Sätz drzue bigstüürt. Welle Teil isch echt vo wem? Mir lönd Euch rote….
Bilder
