Am 23. Januar 2021 hemmer eus z föifte uf de Weg gmacht zur Chrüzhütte be de Bannalp im Kanton Nidwalde. Das natürli unter de aktuelle Corona-Schutzmassnahme – aber zum Glück hend eus die i de freie Natur und bim Skifahre gar ned gstört. Für drü vo eus isch es die erschti Skitour überhaupt gsi. Am Afang het eus de Mario darum en Ifüehrig zum LVS gäh, und mer sind usgrüstet worde mit allem nötige Zuebehör. Schnell isch es denn losgange und noch es paar churze Snack-Pause simmer scho fast ganz obe gsi. Döt het eus de starki Wind de Weg chli erschwert, wells so wenig Schnee uf em Grat ka het hemmer die letschte paar hundert Meter uf de Gipfel z Fuess müesse laufe – aber mer hend eus gfreut, dass mers ganz ufe gschafft hend. Wegem iisige Wind hemmer eus denn aber schnell wieder vom Gipfel und de Ussicht verabschiedet und eus uf d Abfahrt gmacht. Für die het sich de Ufstieg glohnt, mer hend chönne in wunderbarem Pulverschnee vom Chaiserstuel abedüse. Mer hend en spannende Tag erlebt und sind zum Schluss alli de Meinig gsi, dass mer gärn wieder mol anere Skitour teilnäh würded.
Bilder
