Geg dr Mittag fahre mir los. Ganz gmüetlich, mir hän kei Stress. Mir bespräche unterwägs was uns erwartet, froge uns ob mir denn guet usgrüsted sin für unseri Mission. Schnell wird klar, dass mir ganz unterschidlichi Vorstellige vo de bevorstehende Nacht hei und dementsprechend unterschiedlich warmi Schlofsäch debi hän.
Die erste Useforderige chöme wos drum goht isch, de Rucksack z packe. Alli hän e mehr oder weniger volle Rucksack debi. Hald au mehr oder weniger gross. Aber au im klinste Rucksack finde mir no Platz (kei Magie, eifach was nid passt, wird passend gmacht) und unser Znacht darf mit. Wo mir denn zu viert usegfunde hän wie d Bindig vom Gabi funktioniert laufe mir los. Entgege all de Türeler wo scho zrugg chöme und verwunderet gluegt hän wo mir so spoot no ahne wänn. Bi unserem gheime Biwak lade mir Material us und gön mit chli weniger Gewicht uf es chlins aber wunderschüns Türli. Schöni Häng uswähle, Fäll abzieh (ofskinne) und mit Vorfreud uf s Znacht es grandioses Sunnsetfährtli gniesse.
Chli stinke muess es, S git fondue. D Finger sin alli langsahm am friere und de Frost legt sich wie e chalti Dechi über s Tal. Kei wunder, s isch mit -20 Grad eini vo de Chältiste Nächt vom Johr. Dank Stroh und dere verranzte Dechi hän aber trotsdem alli warm bim schlofe.
Irgendwie isch nid ganz klar wär jetzt de Wecker hätt sölle stelle. Aber me mues jo nid immer früeh los 🙂 Mir hän glernt, dass Eier bi -20 Grad gfriere. Aber si gfriere no viel mehr, wenn d Schale e Riss het! Wie au immer, mir hän es riise Gaudi bim zmorge.
Nach em zmorge (fascht scho en Brönsch) verlot uns de Mario. Sin Rucksack isch grösser als er sälber. Und au wenn er nid de Grösti isch, i dem Fall ligts am grosse Rucksack, nid am grossartige Mario 🙂
Mir laufe los, gege e fiise und böse Wind. Mir häns glatt, aber a de Gränze zu Italie, am Fuess vom Gipfel müen mir uns gschlage geh. Alli hänn e Wisses Näsli kah (also vom Schnee. Also vom Wind, mit Schnee und Kälti und so. Also eifach hald e gfroreni Nase. (Nid Falsch verstoh)) S Fondue ligt immerno uf em Mage, aber nüt goht über e gueti Erinnerig 🙂
Während dem het de Mario mit sinerer Heizig fascht sis Auto ahzündet (irgendöppis mit gfrohrenem Gas) und denn no müesse überbrücke will au de Van sehr gfrohre het die Nacht. Wo mir unde ahcho sin isch de Bus langsahm nümm e Küelschrank gsi. Aber trotsdem sin mir no e heissi schogi go zieh.
Zämmegfasst chame sage: Als skitour sicher nid unseri Bestleistig. Aber „Fondueplausch und Schlafen im Stroh mit Tourenski“ isch es doch e super Jäses event gsi. Merci an Mario und Sämi a d Organisation, mit debi au de Straight Line Gurti, d Ladina und de Gabi
Bilder
