Am Samstig Morgä hei mr is gmüätlich uf em Parkplatz uf dr Handegg troffä. Nach erä churzä Kontrollä öb jetzt au jedä sicher s Nötigscht ipackt hed, simmr loos richtig Gruebenhütte. Dank em schönä Wätter simmr denn scho bim Ufstig alli ä chli z schwizä cho. Vor em letztä Ahstig in d Hüttä hed sich d Gruppä denn trennt. Diä eintä si sich im Gletscherseeli go abchüälä, während die anderä si go üäbä Tritt schloo im Iis. Zum Znacht heds denn zur stärkig guäti Teigwarä mit Tomatäsauce gee. Nach em Abwäschä und erä gmüätliche Spielrundi si denn alli früä ins Bett.
Am Sunntig hei mr dennä nid lang usgschloofä. Mr hei früä uf wellä, dass mr am Grot nid in «Stau» chömmä. Am 03:30 simmr alli no rächt Still um ä Zmorgätisch ghockt. Nachdämm allli ihri sibä Sachä packt hei ischs im Schiin vo dä Stirnlampä quer durs Gröll loos gangä, Richtig Gross Diamantstock. Nachdäm s langsam daaget hed, hei mr fr s Firnfäld unter em Grot d Stiigisä montiert und si witer. Diä erstä Meter uf em Grot hämmer denn bi mä wunderschönä Sunnäufgang chönnä gniässä. Bim erstä steilerä Ufschwung simmr denn, wiä scho vo witem befürchtet, trotz em früä Zmorgä doch in Stau cho. Mr si halt nid ganz älei gsi döt obä. Langsam aber stetig simmer denn richtig Gipfel kraxlet und klätteret. Churz vor em Gipfel hed sich denn dummerwiis ä Felsblock glööst und hed mini Hand an d Wand drückt. Dank dr Hilf vo dä anderä JOler isch dä Stei denn aber schnäll wäg gsi und d Hand verbundä. Nach mä fliegendä Wächsel unter dä Seilschaftä simmer denn aber gli witer über ä Gipfel Richtig Abstieg durs Bächlital.
Nach mä langä und erläbnisriichä Daag si den alli froh gsi, wo mr undä am Rätrichsbodensee ahcho si.
Mateo
Bilder
