D JO startet früh am morge mit viel Elan dr Tourtag nach Andermatt mit dr Bahn.
S hüttige Touregrüppli isch scho voller Vorfreud uf e Tag mit viel Sunneschiin und guetem Pulverschnee!
Mit dr Gondle startet d Tour ganz gmüetlich und bringt uns scho uf 3000m ufe Gemstock wo mir unseri Tour startet.
S erst mol d Skimontiert het dr ersti Traumhang scho uf uns gwartet.
Drno hen mir s erst mol für e kurze Ufstiig zügig d Fällmontiert. Das isch Gwüssne eifacher gfalle wie andere. Es Netzli isch ebe amigs scho praktisch demit d Fäll nit zemme klebe.
Mit d Ski uf em Buckel sin mir am Endi de Hocker druf kraxlet zur Gfallerlucke damit mir drno e schöns aber auch aaspruchsvolls Abfährtli hen könne mache.
Nach ere kurze Pause sin Fälli wider dra gsi und mir hen dr längsti Aastieg vom Tag uf de Rotstock in Aagriff gno und sin wieder ca. 500m uf gstiege. D Bindig vo de Noelle het unterdesse no kurzerhand müesse provisorisch gflick werde mit em Skibändel. Ab de Guspislücke ischs den chli ahspruchsvoller worde und gwüssi hen sich drzue entschiede d Harschiise für d letschti Teil zum Gipfel z montiere. Uf em Weg ufe isch den sehr iisig worde und d Harschiise wäre für alli z‘empfehle gsi. D‘ Ladina sich denn drzue entschied nit uf e Gipfel z go und isch abgrutscht trotz em schöne Vorpickle vom Flu. Doch es isch dümmer cho und d ski hen sich glöst sich selbstständig dr Hang derab verabschiidet. Plötzlich isch d Ladina ohne Ski dört gstande und het kei Ahnig gha wie wit die Ski d Hang drab sin ins Tal sin.
Doch glücklicherwis het d Noelle nach ere kurze Sucheaktion die zwei Ski es paar Meter witer unter im Schnee stecke gseh.
Die ganz Truppe het sich den ahgschlosse und sich au gegs d Gipfel entschiede. Will de Rotstock überbewertet wird.
Sobald alli wider d Ski unter de Füess montiert hend, hen mir d Abfahrt ins Tal in Agriff gno.
Überraschend hen mir e geniali Abfahrt mit schönstem Pulver verwütscht und die einzige Linie dörfe zieh! Dr Abfahrtsstil isch sehr unterschiedlich gwählt worde und es het es paar mehr und weniger spektakulär in Schnee taucht. Jede isch mit eme grosse Grinse wider zur Gruppe drzue gstosse. Dr Abschluss vo de Tour isch no mit viel Lauf und Stockarbet verbunde gsi und het sich denn no zoge bis mir wider z Andermatt acho sind. Doch es sin alli wieder heil und zfriede nach dem lange Skitouretag mit vielne Ereigniss und schönstem Schnee unde acho! Danke viil mol em Flu für de super Touretag es het allne grosse Spass gmacht!
Bilder
